2024 оны 10 дугаар сарын 12-13-ны өдрүүдэд Индонезийн Бали аралд Хавдрын абляцийн Азийн 10 дугаар бага хурал (ACTA, Asian Conference on Tumor Ablation) зохион байгуулагдлаа.

　　ACTA нь Азийн хавдрын абляцийн мэргэжилтнүүдэд зориулсан жил бүрийн форум юм. 2014 онд нээлтээ хийснээсээ хойш энэхүү хурал нь абляцийн салбарт эрдэм шинжилгээний хувьд хамгийн том бөгөөд нөлөө бүхий хурлуудын нэг болон өргөжиж, хавдрын абляцийн судалгааны шинэ ололт амжилтуудыг ахиулахад дэлхий нийтийн анхаарлыг татаж, өргөн оролцоог хангаж байна.

　　Энэ удаагийн хурлын сэдэв "Хавдрыг төгс устгах зүгт" (Towards Flawless Tumor Ablation) байлаа. Хятад, Индонез, Өмнөд Солонгос, Япон, АНУ, Тайвань, Сингапур, Филиппин, Малайз зэрэг орнуудын шинжээч, судлаачид хуран цугларч, хавдрын абляцийн салбарын хамгийн сүүлийн үеийн ололт амжилтуудыг хэлэлцэв.

Гуанжоу хотын "Фуда" хорт хавдрын эмнэлгийн ерөнхийлөгч Ню Лижи, төв лабораторийн Ян Янг болон "Фуда" эмнэлгийн Индонез дахь салбарын тэргүүн Лю Жөнпин нар уригдан оролцлоо. Профессор Ню-гийн ахалсан баг "Хими эмчилгээг IRE (нано-хутга)-тай хослуулснаар мэс засал хийх боломжгүй элэгний үүдэвч хэсгийн цөсний сувгийн хавдрын хэсэг газрын хяналтыг сайжруулсан нь" сэдэвт ажлынхаа үр дүнг танилцуулсан юм. Энэхүү илтгэл нь оролцогчдоос өндөр үнэлгээ авч, "Шилдэг илтгэл" төрөлд хоёрдугаар байр эзлэн шагнал хүртлээ.

　　Клацкины хавдар гэж нэрлэгддэг элэгний үүдэвч хэсгийн цөсний сувгийн өмөн (холангиокарцинома) нь зүүн, баруун элэгний сувгийн уулзвар хэсэгт үүсдэг ба нийт цөсний сувгийн хорт хавдрын тохиолдлын 50-70%-ийг эзэлдэг. Энэ нь тавилан муутай хорт хавдар юм. Мэс засал нь эмчлэх цорын ганц боломжит арга боловч ихэнх өвчтөнүүд хожуу шатандаа оношлогддог тул мэс засал хийхэд хүндрэлтэй эсвэл боломжгүй болгодог. Дахилт, ялангуяа хэсэг газрын дахилт (ойролцоогоор 83%) нь амьдрах хугацаанд ихээхэн нөлөөлдөг.

　　Мэс засал хийх боломжгүй элэгний үүдэвч хэсгийн цөсний сувгийн өмөнгийн (UHC) стандарт эмчилгээ нь хөнгөвчлөх хими эмчилгээ бөгөөд амьдрах дундаж хугацаа нь ойролцоогоор 12 сар байдаг. Гэвч хими эмчилгээ хийлгэж буй өвчтөнүүдийн 70%-д 3-р зэргийн буюу түүнээс дээш түвшний хордлого илэрч, шарлалт болон удаан хугацааны гуурс тавих эсвэл дахилтат халдвартай холбоотой хүндрэлийн улмаас амьдралын чанар нь эрс мууддаг. Тиймээс хавдрын үе шатыг бууруулах, даамжралтыг саатуулах, амьдрах хугацааг уртасгах болон амьдралын чанарыг сайжруулах асуудлыг шийдвэрлэх нь нэн чухал юм.

Одоогийн эмчилгээний аргуудад хими эмчилгээ, туяа эмчилгээ, цөсний сувгийн гуурс тавих, фотодинамик эмчилгээ, радио долгионы абляци, бай эмчилгээ болон дархлаа эмчилгээ багтдаг. Эдгээр аргууд нь өвчтөнүүдийн эмчилгээний үр дүнг тодорхой хэмжээгээр сайжруулсан боловч хавдар нь цөсний суваг болон элэгний судаснуудтай ойр байрлах нь бөглөрөл, нарийсал, гоожих, цус алдах, тромбоз үүсэх зэрэг хүндрэлийн эрсдэлийг нэмэгдүүлдэг.

Нано-хутга (IRE) абляци нь дулааны бус шинэ төрлийн абляцийн арга бөгөөд богино хугацааны өндөр хүчдэлийн импульс ашиглан эсийн мембраныг эргэшгүйгээр нүхэлж (электропораци), хавдрын эсийг үхүүлдэг ба энэ үед эргэн тойрны чухал бүтцүүдийг гэмтээдэггүй. Энэ нь онолын хувьд чухал эрхтэн, бүтцүүдтэй ойр байрлах хавдрыг эмчлэх аюулгүй, үр дүнтэй арга юм. 2024 оны 9 дүгээр сар гэхэд Гуанжоу хотын "Фуда" хорт хавдрын эмнэлэгт 1058 удаа IRE ажилбар хийгдсэн нь эмнэлзүйн арвин туршлага хуримтлуулаад байна.　　

　　Эмнэлзүйн судалгаанууд Клацкины хавдрын үед нано-хутга болон хими эмчилгээг хослуулан хэрэглэх нь ирээдүйтэй үр дүн үзүүлж байгааг харууллаа. Тухайлбал, Ромын их сургуулийн профессор Аннагийн хийсэн сүүлийн үеийн тойм судалгаа болон мета-анализаас үзэхэд, нано-хутга эмчилгээг хими эмчилгээтэй хослуулан хийлгэж буй өвчтөнүүдийн амьдрах дундаж хугацаа 25 сар байна. Энэ нь өмнөх дундаж үзүүлэлтүүд болох мэс заслын дараах (29.6 сар) үр дүнтэй дөхөж очихуйц бөгөөд зөвхөн хими эмчилгээ хийлгэсэн (12.2 сар) үеийнхээс хавьгүй өндөр үзүүлэлт юм.

　　Гуанжоу Фуда хорт хавдрын эмнэлгийн (Guangzhou Fuda Cancer Hospital) баг мөн Клацкины хавдрын эмчилгээнд хими эмчилгээг нано-хутга (IRE) абляцитай хослуулах судалгааг боловсруулжээ. Тэд Клацкины хавдартай 47 өвчтөнийг хими эмчилгээ + IRE (n=23) болон зөвхөн хими эмчилгээ (n=24) хийлгэх хоёр бүлэгт хуваан судалсан бөгөөд эмчилгээтэй холбоотой нас баралтын тохиолдол бүртгэгдээгүй байна.

　　Үр дүнгээс үзэхэд хими эмчилгээ + IRE хавсарсан бүлэгт хавдрын хэсэг газрын даамжрал буурах хандлага (16,7% ба 39,5%; p=0,039) ажиглагдаж, бүрэн эдгэрэлтийн түвшин (52,2% ба 12,5%; p=0,011) мэдэгдэхүйц өссөн байна. Түүнчлэн, амьдрах дундаж хугацаа хавсарсан эмчилгээний бүлэгт харьцангуй өндөр (19,6 сар ба 10,2 сар; p<0,001) байв.

Хими эмчилгээг IRE-тэй хослуулах нь хэсэг газрын хяналт, даамжралгүй амьдрах хугацаа болон нийт амьдрах хугацааны хувьд зөвхөн хими эмчилгээ хийснээс илүү үр дүнтэй байгаа нь тодорхой байна. Гэсэн хэдий ч энэхүү судалгаа нь түүвэр цөөн байгаа зэрэг хязгаарлагдмал талтай тул үр дүнг баталгаажуулахын тулд олон төвт, илүү өргөн хүрээний судалгаа хийх шаардлагатай.